Lungisa indawo yakho

Ukuhlala kwezinkanyezi ezinhlanu kuqala ngokunaka izinto ezincane endaweni yakho. Ikhaya elithokomele lingaholela ekuphawulweni kwakho kokuqala okuhle.

ABabungazi abaphumelelayo basikisela ukwenza lezi zinto ezintathu ukuze ugcine indawo yakho ihlanzekile:

• Gxila ezindaweni ezisetshenziswa kakhulu. Sula itafula lasekhishini, hlanza amadreyini, bese ugcwalisa amabhodlela ensipho. Hlolisisa ukuthi akunazinwele ezisele.

• Coca wonke amagumbi. Vula amafasitela, dasida izintuli, bese uhlanza zonke izindawo phansi, nangaphansi kwefenisha. Lungisa imibhede ngamashidi ahlanzekile futhi unikeze zonke izivakashi amathawula ahlanzekile.

• Sungula uhlu lwezinto okumelwe zenziwe. Landela inqubo efanayo ngaphambi kokungena ngakunye ukuze kungabi nalutho olukhohlwayo.

“Ngishiya amahora ayisithupha phakathi kokubhukha ngakunye ukuze sikwazi ukuhlanza kahle,” kusho uDaniel, oyilungu leBhodi Yabeluleki Bababungazi noMbungazi ovelele eCanary Islands, eSpain. “Indawo kufanele ifane ncamashi naleyo oyifake ku-inthanethi.”

Izivakashi zilindele ukuba indawo yakho ibe nezinto eziyinhloko. Yilezi:

• Iphepha lasendlini yangasese
• Insipho (yezandla nomzimba)
• Ithawula lesivakashi ngasinye
• Umqamelo wesivakashi ngasinye
• Amashidi ombhede wesivakashi ngasinye

Siza izivakashi zizizwe zisekhaya ngokunikeza izinto eziwusizo egumbini ngalinye, njengalezi:

Ikhishi

• Izinto zokuhlela itafula ezilingana nenani lezivakashi zakho
• Umshini wekhofi, iketela letiye, amabhodwe namapani, nezinto zokupheka
• Usawoti, i-pepper, namafutha okupheka
• Insipho yezitsha, indawo yokomisa izitsha, nendwangu noma amaphepha okusula

Igumbi lokuphumula

• Izihlalo zazo zonke izivakashi zakho
• I-TV enesevisi yokustrima
• Imanyuwali yendlu eneziqondiso zendlela yokusebenzisa amadivayisi

Indlu yokugezela

• Amathawula ezandla nomata wokugeza
• Ibhulashi lethoyilethi ne-plunger
• I-shampoo, i-conditioner, nomshini wokomisa izinwele

Igumbi lokulala

• Izembozo zamafasitela namatafula aseceleni kombhede anezibani
• Amadrowa noma amahenga ezingubo zokugqoka, nendawo yokubeka izikhwama
• Ingubo yokulala eyengeziwe nefeni noma ihitha

Uma usuyisethile indawo yakho, chitha ubusuku kuyo noma ucele abangane ukuba bahlale futhi banikeze umbiko. Uzothola ngokushesha ukuthi yikuphi okungekho.

Izivakashi ziyajabula uma aBabungazi benaka izinto ezincane futhi benikeza okwengeziwe ukuze benze ukuhlala kwazo kuthokomale kakhudlwana. Lokhu kungahlanganisa ama-ear plug, amaswabhu kakotini, imidlalo, ama-adaptha kagesi, nanoma yini ehambisana nendawo okuyo, njengezambulela noma amathawula asebhishi.

ABabungazi abaningi asebemnkantsh'ubomvu bathi bayakuthanda lokhu:

• Ukunikeza isipho sokwamukela izivakashi. Shiya inothi elibhalwe ngesandla, ubhasikidi wezinto ezimnandi ezitholakala endaweni, noma okuthile kokugubha isenzakalo esikhethekile.
• Ukwenza indawo ithokomale ngokuhlobisa. Cabanga ngalokho okukusiza ungcebeleke lapho usohambweni. Imidwebo yasodongeni, izitshalo, nemicamelo kunganezela ukunethezeka kuveze nobuntu bakho.
• Ukuphrinta imanyuwali yendlu. Beka imanyuwali lapho izivakashi zizoyithola khona kalula, njengasetafuleni ekhishini.
• Gqamisa izici ezikhethekile. Encazelweni yendlu yakho, phawula noma yini oyinikezayo ehlangabezana nezidingo ezithile, njengendawo yokusebenzela noma izici zabanezidingo zokukhubazeka.

“Nginombhede wezinsana ophathwayo, isihlalo esiphakeme, nezincwadi namathoyizi,” kusho u-Elsie, uMbungazi eNashville, eTennessee.

Uma ufuna amacebiso engeziwe futhi ungakakutholi ukubhukha kwakho kokuqala, ungathola isiqondiso somuntu siqu esivela kuMbungazi ovelele. BangaBabungazi abasezingeni eliphezulu futhi asebemnkantsh'ubomvu ku-Airbnb.

Imininingwane ekulesi sihloko kungenzeka isishintshile selokhu sashicilelwa.